Noosa isch de Ort, wo di riiche Lüüt läbet oder Touriste ihres Gäld usgebet.
Nochdem mer scho länger nümme ime richtige Bett gschlofe hend, lömmers üs chli guet goh. Di erste Täg gnüssemer im Resort, i üsem Hüttli oder am Pool. Üs het beidi gad chli s Läsefieber packt!

Do chömmer üüs aber nöd verchrüüche, für da isch d Natur eifach zu schöö, s Wetter zu agnehm und üsi Neugier z gross.

Mir tröffed de Nina ihri Kollegin, wo do e Ustuschsemester macht & beobachtet di unzählige Surfer am Strand. Für üsen letzte Tag hemmer glich no e Tour buecht, wo üüs uf d Insle K’gari bringt. Anschinend di grösst bewachse Sandinsle wos git. De Highway isch eigentlich de Strand selber, im Innere vo de Insle gits en Regewald und denn en wunderschöne See. De Sand döt isch strahelnd wiiss und s Wasser unglaublich schöö türkis.

Mit de Nina ischs witzig, si weiss immer chli öppis z’pläuderle und ihri Freud isch eifach so aasteckend! Zäme schwelged mer immer wieder in Erinnerige a Korea und gnüssed s summerliche Läbe in Australie.