_Reisä_

Was heissts überhaupt z’reise? D’Lüüt gönd eifach so devo uus, dass mer bim reise dauernd underwägs isch & spektakuläri Sache erläbt. Si erwartet scho dast, dass i i voller Freud und Abentüürlust underwägs bi. I verstoh ihri Vorstellge guet. So füült sichs au meistens aa, wenn mer für paar Wuche id Feri fahrt oder flüügt.

Für längeri Ziit ame Ort bliibe & mit dem meini über mehreri Wuche oder gar Monat ch sich durchuus durchgehend guet aagfühle. I dem Fall isches möglich e stabils Umfäld ufzbaue, e tolli Fründesgruppe und regelmässig di gliiche Cafés, Bars und Läde z betrete, lönd eim en fremde Ort zum Dehei werde. D’Tatsach, das mer länger ame Ort isch, macht alles au chli entspannter. D’Sache wo mer unbedingt wött gseh laufed eim nöd devo, me cha sich Ziit loh, alles noh dis noh z’erkunde.
So isch mers zum Bispiel in Seoul gange oder eigentli au jedes Mol woni innerhalb vo de Schwiiz anen neue Ort züglet bi.

Reise isch aber chli anders. Reise isch ziitewiis genau so ufregend und au erholsam wie sich da di meiste vorstelled. Me erläbt und gseht so vill neuartigi und ussergwähnlichi Sache, d’Neugier wird regelmässig gweckt und au gstillt. I ha neui Pflanze entdeckt, neui Sproche zghöre becho, eigeartigi Tier gsichtet, Mensche vo allne Welte beobachtet, troffe und kenneglernt.Aber immer underwägs z’sii isch au streng. Me mue ständig wieder voruus plaane, sich informiere, was alles erforderet wird, was es so zgseh git und sich drüber Gedanke mache, was etz alles no im Budget liit. Me mues ständig sini siebe Sache packe & an neue Ort pendle.

All die gmischte Gmüetszueständ bringed mi schlussendli dezue, drüber nohzdenke was denn s Reise für mii so erläbenswert macht.
S Reise weckt de Neugier, veränderet d Wohrnehmig vo de Umwelt, öffnet de Blickwinkel fürs Anderschsii, schliift de Verstand.
S Reise loht eim d Freud im chliine zgseh, macht eim Wach für di andere und loht eim ganz neui Persönlichkeitszüüg a eim entdecke.
S Reise isch eigentlich e totali Konfrontation mit de Wält, statt i sim eigete Schwiizer Gärtli dehei, ghört mer etz plötzlich zu de ganze Welt echli. Statt e “Jo i wohne z Luzern, a de Baselstross” heissts “I chume us de Schwiiz, bi scho do und döt gsii und etz bini gad do für di nöchste pat Täg” Me isch überall fremd und alles isch absehbar. Kei Wunder macht sich i mir s Bedürfnis mi irgendwo festzsetze gross.

Und au wenns mängmol nöd locker flockig und rosig isch, jedesmol wenni drüber nohdenke, was i alles gseh und erläbt ha, merki, wie vill dass es mir git. Es erfüllt mi mit Stolz, mit Freud und mit ganz vill Zueversicht, dass egal, was chunnt, i chas meistere! (tbc)