Hai isch etz da e schöni Autofahrt gsii!
Tasmanie isch wunderschöö, i cha mer vorstelle chli ähnlich wie Neuseeland, ämel basierend uf dem woni so ghört ha.

Tasmanie het ganz vill Natur und Landwirtschaft zbüüte. So en feine Chääs hani do bi sonere Farm gchauft, Bushberry Lancashire hetter gheisse, vo de Ashgrove Farm. 🧀 Aber s wunderet mi jo nööd so, d Milch chunnt schliesslich au vo Schwiizer Bruunvieh (aso nöd nur, aber au). 🐮
Näbed Viehzuchte gits au Wiigüeter. Wenn i wiedermol sött dohii cho, so für e Mountainbike-Tour, denn würi definitiv mit chli meh Gäld im Portemonnaie cho und mi uf e Wiidegustations-Tour begeh. 🍷

I verschiedene Aspekt hets mi chli ad Schwiiz erinneret, eifach chli anderi Flora und Fauna mit andere Farbe und Strukture. D Bäum hend zum Bispiel riesigi Stämm,ganz vill dicki und au ganz fiini Äst, aber vor allem i de Chrone wachset meistens vill fiini Blätter. D Stämm vo de Eukalyptusbäum sind bsunders speziell, wenn sie sich schelet, denn gsehnds ganz zerzaust und underschiedlich Farbig uus. 🍃🌳🌴
D Vögel töned andersch, allgemein beiidruckt mi di ganz Artevielfalt sowohl bi de Pflanze als au bi de Tier.

Tier hani au immer wieder gseh, am Tag dur hald vor allem Vögel, alli andere Tier sind jo meh nachtaktiv. Uf de Stross hani aber ganz vill toti Wallabies, Wombats, tasmanischi Tüüfeli und Häsli gseh. Da isch leider chli truurig.

Au wenn die alli so verschiede sind, schiined d Australier alli chi Kopie vonenand zsii. Di junge Fraue hend langi, blondi Hoor.