Vill erläbt in Ho Chi Minh!

Au wenns nur 3 Täg gsii sind, mir hend ganz vill verschiedeni Sache gseh, so vill Iidrück i churzer Ziit.
Am erste Tag simmer uf e gführti Tour zu de Cu Chi Tunnels, wos verschiedeni ÜBerbliibsel vom Vietnamchrieg z gseh git. I ha jo i dem Sinn gwüsst dassi nöd gern i enge Rüüm bi, aber da isch denn nomol next Level.

I ha jo scho relativ vill über Chrieg ghört und glese. I ha s Privileg no nie direkt demit konfrontiert gsii sii.

Noch em Bsuech vo dere Aalag mueni aber sege, i chas mer überhaupt nöd vorstelle wie schlimm da isch. I ha s Gfühl zum erste Mol e Vorstellig überzcho ha, wie dass s Lebe under so Bedingige mues sii. I mein hüt baut mer vilicht nüme so brutali Falle oder kilometerlangi, finsteri Tunnelnetzwerk als Bunker und versteckti Transportweg.
Elei 10 Minute ständigs Schüsse im Hindergrund isch für mi unusstehlich. I cha mer würkli nöd vorstelle, wie Lüüt da über Johre ushaltet und au d Vorstellig, wie mer sich dra cha gwöhne, tuet sich schwer.

I ha 20m Untergrundtunnel knapp überstande. Es isch eng, chum belüüchtet, stickig. Me weiss nöd wenns ufhört, en Weg zrugg gits nöd, vor und hinder dir chömed Lüüt. Noch em erste Teil willi umchehre, sisch mer gar nöd wohl. S Iirede, dass s End jo nöd wiit isch funktioniert nöd. De Fakt dassi nümme de gliich wäg zrugg cha, bringt mi dezue mii zämmezriisse und durezlaufe. Wo min Kolleg vor mir denn meint es seg s End bini echt erliechteret.
S Liecht am Endi vom Tunnel het plötzlich ganz e neue Bedüütig, im wahrsten Sinne des Wortes!

D Secret Tunnels hend en ganz merkwürdige Iigang. E unglaublich schmals, rechteckigs Loch, bedeckt miteme Holzdeckel. Dur de cha mer iistiige is Tunnel und hinder sich denn wieder verschlüüsse. Ganz verruckt he!

Au s Chriegsmuseum isch denn sehr erdrückend gsii, aber sehr Gedanke aaregend. Nebed dene eher schwere Iiidrück hemmer au ganz vill schöös gseh, i ha zum Bispiel min Lieblingsturm gfunde. Er heisst zwor eifach Landmark 81, aber isch so schöö, vor allem wenn er znacht belüüchtet isch!😍 D Gebäude i de Stadt wirked chli zämegwürflet, ganz underschiedlichi Architektur und Stils sind z gseh. Es git ganz vill Rollerstrosse, wani sehr sinnvol find, bi all dene Roller und Töff! I bi s erste Mol mit Rollertaxis gfahre.🏍️😇 Z‘Fuess isch s nämmli chli e Katastrophe und me mue entwäder ständig über irgendwelchi Chiste us stiige oder wird vo Roller aagfahre. Z Fuess isches nämmli chli e Katastrophe, entweder mues mer ständig über Chiste uus stiige oder me wird vo Roller aagfahre.

D Lüüt sind sehr fründlich, sie sind stolz uf ihri Nation und überall git’s zesse. Gesse hemmer immer wahnsinnig guet & trunke erst! De Coconut-Lime Saft isch so fein gsii, plus vietnamesische Kafi isch eifach e Highlight!