_En Ort wos alles chli vo alläm öppis het_

Wenn i a Hongkong denk, denn denk i ane Stadt mit ere ewige Skyline. Wenn mer a de Uferpromenade entlang lauft, gseht mer Hochhuus um Hochhuus, es schiint nöd ufzhöre.

Wenn i a Hongkong denk, denki a vill fründlichi Lüüt, wo sich mit üüs underhalted und üüs helfed, ohni sich en eigente Provit zverspreche.

Wenn i a Hongkong denk, denk i anen Ort wo mer schnell id Natur chunnt und sich döt chli us em Stadtläbe cha usklinke.

I denk a ziitewiis qualvolli Wanderwäg und glich schöne Ussichtspünkt mit Blick uf all di umliegende Inseli.
I denk ane Stadt, wos alles git (guets Esse, lebändigs Nachtläbe, nostalgischi Trämmli, moderni Luxusboutique, wüesti Blöck, en Kofferreparierlade, schöni Stränd zum ligge & surfe, e herzigs Fischerdörfli).

Und glich findi schwierig en eigete Charme vo de Stadt z benenne. Es fählt mer chli öppis Bestimmts, wo de Ort einzigartig macht.