_Acho in China_

Üse erst Iidruck vo China isch sehr positiv. Mir hend problemlos chöne iireise, s Zugfahre funktniert sehr intuitiv, alles isch guet aagschriebe. Überall wo mer anegoht, scanneds eim de Pass und s Personal wiist eim immer au an richtige Ort. S Taxifahre isch mit de „Didi“-App super eifach und wenn denn s Zahle mit Alipay oder Wechat mol funktioniert, stoht ere riibigslose Chinareis nüüt meh im Wäg. Es funktioniert mehrheitlich alles tiptop.

D Lüüt sind fründlich, obwohl natürli s kommuniziere chli schwierig isch. Aber wenn mer sich wött verstoh, denn gits immer en Wäg. D Lüüt wirked zfriede, sii läbed relativ eifach (viel spieled verusse, hocked mit ihrne Fründe zäme oder gönd suss irgendwelche Gschäft noh). D Strosse sind breit, suuber, i gseh ganz vill Elektroladestatione und au E-Autos. Sobald mer allerdings chli usserhalb vo de vielbelebte Ort isch, isches aber au sehr schnell mol sehr dreckig.

Öffentlichi Plätz sind immer sehr riesig und usgleit uf ganz vill Lüüt.
Highspeedtrain-Bahnhöf ähnlet Flüghäfe vom Gebäude bis zu de Abläuf mit Security & Check-in. D Züg sind schnell und i de Regel recht komfortabel. Sobald mer aber chli i chlinere Züg fahrt, hets en Huufe Lüüt, au gaz vill „Stehplätz“. Irgendwie isch anschiinend au Rauche i gwüsse Züg e Ding, uf einere Zugfahrt hends im Abteil näbeddraa richtig qualmt.

Wani no spannend find, sind d Gräber, wo mer chli usserhalb vo de Wohngebiet immer wieder gseht. So hets ime Wald oder ame Hügel amel eifach e paar Erdhüüfe, mit Schild und/oder Blueme. Es wirkt irgendwie nöd so als wär do irgend e System dehinder.

———

Uf em Wäg zu üsre erste Wanderig werdet mir leider no inen Unfall involviert. Üse Taxifahrer fahrt voll inen Roller ine. I gseh nur wie de Fahrer uf üsi Windschutzschiibe prallt und an Bode gheit. Siis Gfährt liit i zwei Teil hinder üüs und näbed üüs uf de Stross. Üses Taxi isch vorne total verbüült. Chli gschockt und im Taxi iigsperrt müemmer abwarte wa etz passiert. De verletzt Fahrer stoht mit bluetigem Chopf und wacklige Bei am Strosserand. Bald scho ischs Chrankeauto und au d Polizei vor Ort, mir hend e neus Taxi bstellt und hend üüs glich no uf üsen Usflug begeh.

D Karstberge do in und um Guilin sind richig schöö! Mir hend d Natur und s Streetfood trotz uufregendem Morge richtig gnosse hüt.