_Zrugg in Seoul_

Scho verruckt, meistens hani nochdem i ime andere Land gsii bi s Gfühl ‘etz hanis jo gseh" und bi offe, öppis Neus z entdecke, woni no nöd gseh ha. Scho spannend, dassi etz glich scho zum dritte Mol in Seoul lande. Es fühlt sich so guet aa, wieder zrugg zsii gad, eigentlich chli wie Heicho.

Noch de vergangene Mönet woni chum still bliibe bi, vo Ort zu Ort greist bi, bini wieder ime gwohnte Umfeld. Do verstohni d Sproch so meh oder weniger, do weissi, wieni mi z verhalte ha, d Lüüt gönd ihrne eigete Tätigkeite no, sind aber richtig fründlich, wennd ihne en Grund gisch, mit dir z interagiere. Si sind für mi fäng sehr absehbar: do warteds wieder i ihrne Einerkollone uf de Bus, döt squateds am Strosserand mit ihrere Zigarette i de Hand, Arbetskolleginne sind uf em Wäg zu de Znachtlocation, alles het offe bis spot id Nacht. Defür isch de Morge eher ruhig, vor em 10i gangi no niened hii.🛌🕙

S Läbe do in Seoul isch eifach so aagnehm für mi. Alles wo mer bruucht, isch in churzer Ziit erhältlich: z.B. en neue ApplePen, Kafi a jedem Egge (und denn no min lieblings: pananalatte, iced juseyo!🥤) und mit all de Convenience stores au immer alles mögliche a Alltägsgägeständ, öppis z Trinke oder au e schnelli Mohlziit.🍜 Alläs isch au so schnell und eifach erreichbar mit em Bus oder de Metro.🚇

S Fernstudium macht do au richtig Spass! Jede Morge suechi mir e schös Kafi i de Umgäbig und gsell mi döt zu all de Lüüt, wo au do sind, zum produktiv sii.👩‍💻

Näbed em Studiere bini chli am Laufe i de Pärk oder dur d Strosse schlendere. Am Obig tröffi mi mit mine Fründe, woni do jo inzwüsche ha (au wenn einigi au scho wieder s Land verloh hend). S Wetter isch aagnehm früehligshaft, d Sunne schiint & d Chriesiblüete sind au do überall am sprüsse!🌞🌸

Und denn natürli s Highlight: mini Familie isch au aachoo! I ha Freud ihne da zeige wo mir do so gfalle het & no Sacha mit ihne mache, woni selber no nöd gschafft ha z mache.