_E hundsgemeini Stadt_

Hirosaki isch e Stadt so gross wie Basel aber ganz e ländlichs Image versprüet. D Strosse sind erstuunlich eng, es het enorm vill Schnee, sisch nöd gross öppis los. I beobachte d Lüüt wie si am morge go schaffe gönd, am mittag heigönd go esse und beobachte Chind wies i ihrne Uniforme id Schuel laufed und mit em Schuelbus vor ihrere Huustüür abglade werdet. 🚌 D Lüüt sind eifach aagleit, sind stolz uf ihri Traditione und engagiered sich für ihri Community. Englisch redet aber praktisch kein. Stattdesse laberets mi voll au no nochdem s merket, wieni so gar nüüt verstoh.😅 Irgendwie gits mer nöd aasatzwiis s Gfühl inere Stadt zsii, vilicht hani mi aber au scho zfest a riese Metropole wie Seoul oder Tokio gwöhnt.🤷🏻‍♀️

Bekannt sinds für ihres Handwerk und ihri Öpfel, uf die sinds bsunders stolz. Woni verzellt ha das mir i de Schwiiz au gueti Öpfel und sogar Cider hend, hends natürli gad meh drüber wöle wüsse. So hani ihne natürli de Saft vom Fass vorgstellt. 🍎🍶

S Hostel i dem i gsii bi isch mega schöö iigrichtet gsii & i bi au richtig herzlich in Empfang gnoh worde. Im Bistro hets immer öppis feins zschnabuliere geh, sodass i vill Ziit au eifach döt verbrocht ha.

Wenni nöd im Hostel chillt ha, denn bini chli dur d Strosse gschlenderet und chli Sache go aaluege:
* d Burg vo Hirosaki, die isch vor allem zur Kirschblüeteziit e Touristemagnet 🏯🌸
* alti Bank- und Missionsgebäude und au e alti Bibliothek im europäische Stil 🏦
* e Usstellig wos traditionelli Festumzugsmaske und Wäge usstelled, die fiired do au so öppis wie Fasnacht 👹
* en Büecherlade vo en ganze Stock i de Shoppingmall usfüllt 📚
* ha d Ussicht uf de Huusberg gnosse und Föteli gmacht im Park 🗻📸
* bi is Museum für gegewärtigi Kunst,vor allem d Digital Arts Werk hend mi persönlich sehr begeisteret 🎥 🖼️
* I ha lokali Spezialitäte probiert, wie z.B. Buechweizesoba-Nudle und diversi Öpfelgebäck wo mi scho sehr fest a dehei erinneret hend. 🍜🥧